Unity Khabar

ह्वाटमोर नेपाल पर्किदै, त्रिकोणात्मक सिरिजका लागि नेपालले प्रशिक्षण सुरु गर्ने

काठमाडौं : नेपालले त्रिकोणात्मक सिरिजका लागि अर्को सातादेखि प्रशिक्षण सुरु गर्ने भएको छ। आईसीसी विश्वकप क्रिकेट लिग टू अन्र्तगत नेपाल, नामिबिया र स्कटल्याण्डविचको सिरिजका लागि नेपालले प्रशिक्षण सुरु गर्ने भएको हो।

नेपाल, नामिबिया र स्कटल्याण्डविचको सिरीज स्पेनमा हुने छ। नेपालले अर्को सातादेखि प्रशिक्षण सुरु गर्ने भएपछि नेपाली टिमका मुख्य प्रशिक्षक डेभ ह्वाटमोर नेपाल आउने भएका छन्।

नेपालमा कोरोना भाइरसका दोस्रो लहर फैलिँएर लकडाउन भएपछि ह्वाटमोर श्रीलंका फर्किएका थिए। अब टिमको क्याम्प सुरु हुने भएपछि उनी अर्को मंगलबार काठमाडौं आइपुग्ने क्यानले जानकारी दिएको छ।

क्यानकाअनुसार ह्वाटमोर नेपाल पुगेको केहि दिन लगत्तै टिमको प्रशिक्षण सुरु हुनेछ। नेपाली टिमको क्याम्पमा पहिलो चरणमा २१–२२ खेलाडीलाई राखिने भएको छ। त्यसबाट अन्तिममा १५ खेलाडीलाई त्रिकोणात्मक सिरिजका लागि छनोट गरिनेछ।

नेपाली टिमले सुरुवाती चरणमा नेपालमा नै प्रशिक्षण गरेपनि त्यसपछि बैदेशिक भूमीमा करिव दुई साता प्रशिक्षण गर्ने गरि क्यानले तयारी थालेको छ। तर, अहिलेसम्म कुन देशमा जाने भन्ने टुंगो भने लाग्न सकेको छैन।

स्कटल्याण्डका हुनुपर्ने यो सिरिज कोरोनाको कारण अन्तिम समयमा स्पेनमा गर्ने तयारी छ। तर, अझैपनि प्रतियोगिताको मिती र तालिका भने सार्वजनिक गरिएको छैन्। लिग टू मा नेपालले अहिलेसम्म चार खेल खेल्दा दुई जित र दुई हार ब्यहोरेको छ।

घरेलु मैदानमा भएको खेलमा नेपालले अमेरीकाविरुद्ध दुई खेलमा जित हात पारेको थियो भने ओमानसँग दुबै खेलमा पराजित भएको थियो।

सम्बन्धित पाेष्टहरु
Loading...