डडेल्धुराः प्रधानमन्त्री एवं नेपाली कांग्रेसका सभापति शेरबहादुर देउवाले नेकपा माओवादी केन्द्रका स्थायी समिति सदस्य एवं सुदूरपश्चिम इञ्चार्ज खगराज भट्टको खुलेरै प्रशंसा गरेका छन्।
बिहीबार गृहजिल्ला डडेल्धुरा सदरमुकाम बसपार्कमा सत्ता गठबन्धनले आयोजना गरेको बृहत् चुनावी आमसभालाई सम्बोधन गर्दै प्रधानमन्त्री देउवाले प्रदेशसभा १ का उम्मेदवार भट्टको प्रशंसा गरेका हुन्।
उनले खगराज चुनाव जित्न योग्य व्यक्ति भएको बताए। देउवाले खगराज अत्यधिक बहुमतले जिताउन पनि प्रदेशसभा १ का मतदातालाई आग्रह गरे। उनले भट्टलाई जिताएर कस्तो काम गर्छन् त्यो पनि हेर्नुपर्ने औंल्याए। देउवाले खगराजको बोल्ने र भाषण शैलीको पनि खुलेरै प्रशंसा गरे।
‘खगराजजीले कति राम्रो बोल्नुभयो। चुनाव लड्दा जितहार हुन्छ,’ विगतमा आफूसँग पराजित भएका भट्टको तारिफ गर्दै देउवाले भने, ‘विगतका चुनावमा उहाँले हार्नुभयो केही छैन। तर, उहाँ जित्न योग्य मान्छे हुनुहुन्छ।’
खगराजलाई भोट माग्दै देउवाले अगाडि भने,‘यसपालि उहाँलाई अत्यधिक बहुमतका साथ जिताऔं। उहाँले कति राम्रो काम गर्नुहुन्छ त्यो पनि हामीले हेर्नुपर्छ। मलाई जिताएर हेरिसक्नुभयो। अब उहाँलाई जिताएर हेर्नुपर्छ, उहाँमा काम गर्ने इच्छा पनि छ।’
खगराजको प्रशंसा गरिरहेका देउवा यत्तिमै रोकिएनन्। उनले खगराजलाई बौद्धिक र अध्ययनशील नेता भएको पनि बताए। उनले गठबन्धनका सबै उम्मेदवारलाई जिताएर पठाउन मतदातासँग आग्रह गरे।
सोही कार्यक्रममा खगराजले देउवालाई १ सय ६५ वटा निर्वाचन क्षेत्रमध्ये अत्यधिक मतले जिताउन आग्रह गरे। देशलाई संकटबाट जोगाउनका लागि प्रधानमन्त्री देउवाले अहम् भूमिका खेलेकाले अत्यधिक मतका साथ जिताउन आग्रह गरे।