डडेल्धुरा: डडेल्धुरामा जिप दुर्घटना हुँदा एक जनाको मृत्यु भएको छ। कञ्चनपुरको दैजीबाट डडेल्धुराको रुपालतर्फ आउँदै गरेको म १ ज २३८ नम्बरको जिप परशुराम नगरपालिका–३ मट्यौलामा सोमबार दिउँसो दुर्घटनामा परेको हो।
दुर्घटनामा भागेश्वर गाउँपालिका–२ की ५० वर्षीया बाशुदेवी तिरुवाको मृत्यु भएको जिल्ला प्रहरी कार्यालय डडेल्धुराका प्रहरी नायब उपरीक्षक मनोहर भट्टले जानकारी दिए।
उनका अनुसार तिरुवाको घटनास्थलमै मृत्यु भएको हो। अन्य केही यात्रु घाइते भएका छन्। जिप सडकमै पल्टिएको डीएसपी भट्टले बताए। जिपमा चालकसहित ११ जना यात्रु सवार थिए। सडकमा ब्याक गर्ने क्रममा जिप दुर्घटना भएको बताइएको छ।
