डडेल्धुरा: डडेल्धुराको भागेश्वर गाउँपालिकाले पालिकाभित्र रहेका ५ जना उद्यमीहरुलाई नगदसहित सम्मान गरेको छ । नवौं उद्योग दिवसको अवसरमा पालिकाले प्रत्येक वडाबाट एक÷एक जना गरेर पाँच जना उद्यमीलाई सम्मान गरेको गाउँपालिकाका प्रमुख प्रशासकीय अधिकृत खगेन्द्र भारतीले बताए ।
‘स्वदेशी उत्पादन अभियान उद्यमीको सम्मान ’भन्ने नारासहित दिवसको अवसरमा पाँच जनालाई सम्मान गरिएको हो । शनिबार एक कार्यक्रमकाबीच उद्यमीहरुलाई गाउँपालिका अध्यक्ष हेमराज चटौतले प्रतिव्यक्ति दुई हजार नगदसहित सम्मान पत्र प्रदान गरे ।
दिवसको अवसरमा सम्मानित हुनेमा वडा नं १ को पोलेक अल्लो प्रशोधन साझा सुविधा केन्द्रका उद्यमी करिश्मा थापा मगर, वडा नं २ स्थित बुढामगर सिलाई सेन्टरका सञ्चालक कौशिला बुढामगर, वडा नं ३ स्थित मंगलेश्वर कृषि तथा पशुपालन फर्मका सञ्चालक मानसिंह मडै, वडा नं ४ स्थित अशिग्राम कृषि तथा पशुपालन फर्मका सञ्चालक प्रेम नाथ र वडा नं ५ स्थित करिना कृषि तथा पशुपन्छी फर्मका सञ्चालक टेकसिंह चाड रहेका छन् ।