डडेल्धुरा: डडेल्धुरामा सम्पन्न खुल्ला पुरुष भलिबल प्रतियोगिताको उपाधि जिएसएम बिल्डर्स प्रालि अजयमेरुले जितेको छ। शनिवार भएको फाइनल खेलमा अर्जुनवाण गण दह ब्यारेकलाई ३–२ को सेटमा हराउँदै जिएसएम बिल्डर्सले उपाधि उचालेको हो।
उपाधिसँगै जिएसएम बिल्डर्सले ५५ हजार ५ सय ५५ रुपैयाँ र दोस्रो स्थानमा चित्त बुझाएको अर्जुनवाण गणले २५ हजार ५ सय २५ रुपैयाँ नगदसहित ट्रफी, मेडल र प्रमाणपत्र पाएको छ।
प्रतियोगितामा जिवीएल हार्डवेयर प्रालिलाई हराउँदै मिसन निशान्त कालीज फर्म तृतीय भयो। उसले १५ हजार ५ सय ५५ नगदसहित ट्रफी, मेडल र प्रमाणपत्र पायो।
डडेल्धुरा जेसीज वर्ष २०२४ को आयोजना तथा अजयमेरु गाउँपालिकाको मुख्य प्रायोजनमा बुधबारदेखि सुरु भएको प्रतियोगिता शनिवार सकिएको हो।
जिएसएम बिल्डर्सका बलदेव धामी प्रतियोगिताको सर्वोत्कृष्ट खेलाडी घोषित भएका छन्। उनले पाँच हजार नगदसहित ट्रफी पाए।
यस्तै, प्रतियोगितामा बेस्ट ब्लकर जिएसएम बिल्डर्सका भरत विक, बेस्ट सेटर बिल्डर्सकै सागर जैरु, बेस्ट स्पाइकर अर्जुनवाण गणका आशिक सुनार र बेस्ट डिफेन्डर सुदीप छन्त्याल बनेका छन्। विधागत रूपमा उत्कृष्ट खेलाडीलाई ट्रफी प्रदान गरिएको थियो।
डडेल्धुरा जेसीज वर्ष २०२४ की अध्यक्ष लक्ष्मीकुमारी ऐरले प्रतियोगितालाई सभ्य र भव्य रूपमा सम्पन्न गर्न सहयोग गर्ने सबैलाई धन्यवाद दिइन्। जेसीज सप्ताहअन्तर्गत डडेल्धुरा बहुमुखी क्याम्पसको प्राङ्गणमा आयोजित प्रतियोगितामा जिल्लाका ८ टिमको सहभागिता रहेको थियो। 
