डडेल्धुरा : आसन्न स्थानीय तहको निर्वाचनलाई लक्षित गरी डडेल्धुरामा शान्ति सुरक्षाको व्यवस्था चुस्तदुरुस्त पारिएको स्थानीय प्रशासनले जनाएको छ ।
नेपाल प्रहरी, सशस्त्र प्रहरी, म्यादी प्रहरी साथै आवश्यकता अनुसार नेपाली सेनालाई परिचालन गरी सुरक्षा व्यवस्थापन मिलाइएको डडेल्धुराका प्रहरी निरीक्षक तथा सूचना अधिकारी उमाकान्त जोशीले जानकारी दिएका छन् ।
मतदानस्थलको सुरक्षामा थप सुरक्षाकर्मीको आवश्यकता परे तत्कालै थप सुरक्षा सुरक्षाकर्मी उक्त स्थानमा पुग्नसक्ने गरी मतदानस्थलमा सुरक्षाको व्यवस्थापन मिलाइएको जोशीले जानकारी दिएका छन् ।
यसैगरी, निर्वाचनलाई भयरहित शान्ति सुरक्षितरूपमा सम्पन्न गर्न तयारी भएको बताइएको छ । मतदानपछि मत गणनास्थललाई सुरक्षित राख्न तारजालीको प्रयोग गरी आवश्यकता अनुसार सिसी टिभीसमेत जडानको कार्यको लागि समेत प्रत्येक पालिकामा छलफल भइरहेको उनको भनाइ छ ।
जिल्लामा ११ वटा साना/ठूला दलका प्रतिनिधिसहित स्वतन्त्र रुपमा उम्मेदवार स्थानीय चुनावमा प्रतिस्पर्धामा छन् । नेपाली काँग्रेस, नेकपा (एमाले), नेकपा एकीकृत समाजवादी, नेकपा माओवादी केन्द्र, नेपाली काँग्रेस (बिपी), राष्ट्रिय प्रजातन्त्र पार्टीलगायत अन्य साना दलका उम्मेदवार र अन्य स्वतन्त्र उम्मेदवार निर्वाचनमा प्रतिस्पर्धा गरिरहेका छन् ।