डडेल्धुरा: डडेल्धुरामा दुई मोटरसाइकल एकआपसमा ठोक्किँदा तीनजना घाइते भएका छन्।
जिल्लाको आलिताल गाउँपालिका–४ को कार्यालय नजिक आलिताल–४ बेल्भाडीका १९ वर्षीय कमल बोहराले चलाएको सुपप्र ०१–००१० प ३९९४ नम्बरको मोटरसाइकल र विपरीत दिशाबाट आइरहेको आलिताल–८ तेकुनडाँडाका ३७ वर्षीय गणेशप्रसाद भट्टले चलाएको सुपप्र ०१–०११ प ७८०१ नम्बरको मोटरसाइकल एकआपसमा ठोक्किएका हुन्।
मंगलबार भएको दुर्घटनामा मोटरसाइकल चालक कमल बोहरा, सोही मोटरसाइकलमा सवार आलिताल–४ की १४ वर्षीया खगेश्वरी बोहरा र ११ वर्षीया यशोदा बोहरा घाइते भएको इलाका प्रहरी कार्यालय जोगबुढाका प्रहरी निरीक्षक गगनसिंह भाटले जानकारी दिए।
उनका अनुसार खगेश्वरीको अवस्था गम्भीर छ। यशोदाको टाउकोमा र कमलको हातमा चोट लागेको जनाइएको छ। घाइते तीनै जनालाई उपचारको लागि धनगढी पठाइएको छ। अर्का मोटरसाइकल चालक भट्टलाई प्रहरीले नियन्त्रण रहेको प्रहरी निरीक्षक भाटले बताए।